Graubünden 2005

< Zurück | Übersicht | Weiter >

Touchweekend Bündnerland 9.-11.09.2005

E chlini Gruppe het sich am Fritig Abe im Hotel Solaria in Bivio troffe. E chli schwätze u es guets Wili, vorem is Bett ga muess immer si!

Usgschlafe u verpflegt nach emene feine Zmorge isch es denn losgange. A Silsersee simer gfahre u zwar nach Maloja zum Zeltplatz. Dert hei mir dörfe parkiere u die letschte 500 Meter hei mir mit em Touchzüg müesse wandere. D Carla het sich bi dem Marsch immerhin 50 Schritt gspart, gell!

Bild 1

Dr erscht TG het vor allem schöns Seegras u selte mal e Fisch bote. Ou d Schiefersteine unter Wasser si sehr schön gsi. Aber mit dr Zit isch es denn e chli längwilig worde u dr Usstieg het u het nid welle nächher rücke. Bim Zeltplatz hei mir de e Kueche gha u ztrinke, u dr Tashi het nach langem warte doch no sini Wurscht übercho, e Cervelat zwar, statt e Bratwurscht!

Lang hei mir grätslet, was mache mir aus nächschts? Ga esse u de ga touche, oder ga touche u de ga esse u Znacht de wider esse? Doch zersch touche u zwar in Plaun da Lej! Mir hei aber dr gäbig Ischtig bim Stägli gwählt. E schöne Touchgang isch es gsi. Dr Oldtimer isch aber scho fangs chli am vergheie u ds James Bond 007 Schild het ou öper eifach mitgno!

Nach em Touchgang si dr Hans, d Martha, dr Fritz, d Carla, dr Chregi, dr Tashi u d Madeleine es Plättli ga esse u d Barbara u dr Chrigi hei in Samedan e Bsuech gmacht.

Am 18.30 Uhr si mir de aber alli wider vereint bim Znacht gsässe. I üsem Hotel hei mir Wild bschtellt, schliesslich hei mir d Jäger am Morge gseh u ghört! Gams, Reh, Hirsch, Mung oder doch lieber eini vo de 4 Bäretatze? Gams und Mung het nid e so gmundet aber ds Drumum isch super fein gsi!

Öpe am 21.30 Uhr si mir de gone Nightdive im Marmorerasee mache. Dr schönscht TG vo dem Weekend! Vili Forelle hets gha, gueti Sicht u vili schöni Wurzelstöck wo gspengschtisch usgseh hei!

Bild 2Bild 3

Nachemene Schlummertrunk si mir alli recht müed is Bett gheit!

Am Sunti denn bim Zmorge hets abe glärt wie us Chüble! Mänge vo üs het scho fasch d Luscht am Touche verlore. Zum Glück hets de bim Usrüschte u Versorge ufghört! Dr TG isch nid für viu gsi! Bim Bachilouf isch e dräckegi Brühi derher cho, u ab 15 Meter hesch gar nüm gseh, nid emal meh d Verbouige. So si mir de haut nid alli drüber abe gschwebt, sondern nume obenusse toucht u a völlig unerwartete Orte uftoucht, obschon dr Kompass doch eigentlich öpis anders gseit het!

Ufgwärmt hei mir üs de no mal ds Bivio ire Beiz, bevor de nachher jede sim eigete Weg nache gange isch!

Einisch meh het dr Chregi es super Touchweekend organisiert! Danke Dir viumau!

Barbara Ammann