2* Brevet-Kurs 15.09.2004

2* Kursbericht Herbscht 2004

Es isch no nid lang her, da hani settegi Sprüch müesse ghöre: «Wenn machsch ds 2** endlich?» oder «Wenn mer im Vorstand isch, de sött me scho ds 2**ha».

Drum hami ufgrafft. Obschons mir zwider isch gsi, muess i jetz säge, es isch guet, dass is gmacht ha. I weiss jetz, dass i amene Toucher in Not chönnt helfe.

Am Infoabe im Ouguscht hei s’Häusermanns und mir mit em Walti probiert Termine z finde. Das isch scho mal recht schwierig worde.

D 2** Theorie hei mir denn a 5ne Äbe im September dürezoge, inklusive dr Prüefig. Üse Wunsch isch es gsi, dass mir no vor üsne Ferie am Rote Meer Bscheid werde wüsse, öb mir bestande hei. 7 A4 Site het üs dr Walti la schribe. Mir hei gschribe u gschribe….u d Chöpf hei grouchnet. Damit dr Walti grad mit korrigiere het chönne afa, hei mir die glöste Blätter füre gä zum Korrigiere. So hei mir unmittelbar nach dr Prüefig gwüsst, dass mir alli bestande hei. Und so öpis muess natürlich gfieret si! Bire Pizza und emene Bier hei mir druf agstosse, dass mir jetz unbeschwert i d Ferie chöi flüge. Leider hets keis Stella gä, gell Heinz? Aber halt, dass hei mir denn ja no nid kennt!

Denn si mir z Viert as Rote Meer gfloge uf El Quseir. Dr Chrigi und i hei s’Häusermanns ds Touche im Meer zeigt. Hie nume es paar Highlights: Mir hei mit wilde Delfine chönne touche, mir hei die spanischi Tänzerin und d Flügelrossfische gseh u viu Sunne tanket für dr chalt Winter bi üs ir Schwiz. Fertig gschwärmt, i sött ja e Bricht vom Kurs schribe. So het me mi nämlich beuftreit.

Chum zrügg ir chalte Schwiz si die prakzische Üebige losgange:
Abwechsligswies am Lopper, in Beckeried und in Weggis hei mir glernt, wie mer e Rettig dureführt und was es süsch no so für Zwüschefäll chönnt gä unter Wasser und wie me se behebt. Da derbi hei üs verschiedenschti Lüt ghulfe: Peter, Stefan Sch., Christian M., Tashi, Christian G., Andi, Markus und natürlich dr Walti.
Herzliche Dank öich allne, dass dir öich bemüit heit, üs die Situatione so real wie möglich vor z› spile. Vor allem dr Tieferusch het üs amüsiert: Das isch vo i See use schwimme u lut singe, über Holz knabere und Dreck «fresse» bis d Brille im Schlick verstecke gange.Verschidenschti Zeiche si unter Wasser Schlag uf Schlag cho. Da hets scho mal chönne passiere, dass dr Touchschüeler/ d Touchschüelerin het müesse usser Atem azeigeJ. Ou ds Venolsystem het mer üs no mal zeigt. Und nid z vergesse dr Füehrigstouchgang. Dr Hans, d Bea, dr Heinz B. und dr Stefan K. hei sich meh oder weniger vo üs düre Touchgang la füehre. Bi dem TG hei mir vier de am Schluss no müesse ds Jacket abzieh, dr Hahne zueschrube und dr Outomat use nä. Ou das isch tatsächlich gange, und wenn mer vo Afang a die richtegi Site bim Jacket ufta hätt, de wärs ou richtig eifach gsi. Aber ebe hätt me, i ha nid, u drum hani e richtig länge Kampf gha unter Wasser. Aber ou i has gschafft.

Am letschte Weekend si mir de no so richtig verwöhnt worde mit schönem und warmem Wetter. Beschti Vorussetzige für die praktischi Prüefig. U das hei mir müesse mache: Partnercheck, 3m Check, abtouche uf 25 m, Rettig vo dere Tiefi bis ufe, erkläre wies witer gieng bi dere Rettig, Freiwasserabstieg mit 3m Check, ahalte uf 15m, witer abstige uf 25m, Maske abzieh, Zeiche interpretiere, Wechsuatmig mit Freiwasserufstieg uf 10m, Ufstieg uf 6m mitem Kompass ds Land sueche, ustouche. Zum Schluss no mal es grosses Merci a alli Helfer u natürlich ou a Walti, üsem «grosse Touchlehrer»! Du hesch das super gmacht!

Barbara